ایران پر نئی امریکی پابندیاں، اقتصادی لائف لائنز منقطع کرنے کا اعلان

امریکی وزیرِ خزانہ اسکاٹ بیسنٹ نے ایران کے خلاف نئی اور سخت معاشی پابندیاں عائد کرنے کا اعلان کرتے ہوئے کہا ہے کہ ان اقدامات کا بنیادی مقصد تہران کو سہارا دینے والی تمام معاشی لائف لائنز کو قطع کرنا ہے۔ واشنگٹن میں میڈیا بریفنگ کے دوران انہوں نے کہا کہ ایران سے اقتصادی روابط اور مالیاتی شراکت داری رکھنے والے ممالک اور اداروں کو محدود مہلت دی جائے گی، جس کے بعد ان پر شدید امریکی کارروائی اور ثانوی پابندیاں عائد کی جائیں گی۔ امریکی وزیرِ خزانہ نے واضح کیا کہ دیگر ممالک کو اپنی سرزمین پر موجود ایرانی بینکوں کی شاخیں بھی فوری بند کرنا ہوں گی، کیونکہ واشنگٹن تہران پر معاشی دباؤ بڑھانے کے لیے اپنے تمام دستیاب اختیارات استعمال کرے گا۔