پنجاب بھر میں کھلی فضا میں ڈرون اڑانے پر مکمل پابندی عائد

حکومت پنجاب نے سیکیورٹی خدشات کے پیش نظر صوبہ بھر میں کھلی فضا (آؤٹ ڈور) میں ڈرون اڑانے پر عائد پابندی میں مزید 30 روز کی توسیع کر دی ہے۔ محکمہ داخلہ پنجاب کی جانب سے جاری کردہ نوٹیفکیشن کے مطابق یہ اقدام ضابطہ فوجداری کے سیکشن 144 کے تحت امن و امان کے قیام اور املاک کے تحفظ کو یقینی بنانے کے لیے اٹھایا گیا ہے۔ فیصلے کے تحت ہالز اور مارکیز کی اندرونی تقریبات میں چھوٹے ڈرونز کے محدود استعمال کی مشروط اجازت ہوگی، جبکہ زرعی، آبپاشی یا تحقیقی مقاصد کے لیے ضلعی ‘سیف ڈرون یوزیج کمیٹی’ سے تحریری اجازت نامہ حاصل کرنا لازمی قرار دیا گیا ہے۔ قانون نافذ کرنے والے اور انٹیلی جنس ادارے اس پابندی سے مستثنیٰ ہوں گے۔