عمران خان کی ہسپتال منتقلی کا حکم، اسلام آباد انتظامیہ نے نظرثانی اپیل کی جلد سماعت کی درخواست دائر کر دی

چیف کمشنر اسلام آباد نے بانی پی ٹی آئی عمران خان کی اڈیالہ جیل سے نجی ہسپتال منتقلی اور طبی معائنے سے متعلق سپریم کورٹ کے 18 اگست کے حکم کے خلاف دائر کردہ ریویو پٹیشن کی جلد سماعت کے لیے متفرق درخواست جمع کروا دی ہے۔ نظرثانی کی درخواست میں عدالتی فیصلے پر اعتراض اٹھاتے ہوئے اسے واپس لینے اور ترمیم کی استدعا کی گئی ہے۔ درخواست گزار کے مطابق یہ معاملہ صرف طبی سہولیات کا نہیں بلکہ متعلقہ قانونی و آئینی دائرہ اختیار سے بھی مشروط ہے۔ ریویو پٹیشن میں 27ویں آئینی ترمیم کے بعد عدالتی دائرہ اختیار، آرٹیکل 175 (2)، آرٹیکل 25 اور جیل قوانین (پاکستان پرزن رولز 1978) کے تحت اہم قانونی سوالات اٹھائے گئے ہیں۔ درخواست میں مؤقف اختیار کیا گیا ہے کہ سپریم کورٹ کا فیصلہ وقت کی پابندی پر مبنی تھا، اس لیے عدالتی حکم اور سیکیورٹی معاملات کے پیش نظر ریویو پٹیشن کو فوری طور پر سماعت کے لیے مقرر کیا جائے۔