ایئرکرافٹ انجنیئرز کے احتجاج سے پی آئی اے کا فلائٹ آپریشن معطل، بین الاقوامی پروازیں بند، مسافر پریشان

کراچی: قومی ایئر لائن (پی آئی اے) کا فلائٹ آپریشن ایئر کرافٹ انجنیئرز کے احتجاج کے باعث ملک بھر میں تعطل کا شکار ہوگیا ہے اور گزشتہ رات 8 بجے کے بعد سے کوئی بین الاقوامی پرواز روانہ نہیں ہو سکی۔ متعدد پروازیں تاخیر یا منسوخی کا شکار ہیں جس کے نتیجے میں مسافروں کو شدید مشکلات کا سامنا ہے، جبکہ متاثر ہونے والوں میں بڑی تعداد عمرہ زائرین کی ہے۔

ذرائع کے مطابق سوسائٹی آف ایئر کرافٹ انجنیئرز نے طیاروں کی کلیئرنس روک دی ہے اور مؤقف اختیار کیا ہے کہ سی ای او پی آئی اے کے رویے میں بہتری تک وہ اپنے فرائض انجام نہیں دیں گے۔ اسی وجہ سے متعدد قومی و بین الاقوامی پروازیں روانہ نہ ہوسکیں یا تاخیر کا شکار رہیں۔

پی آئی اے انتظامیہ نے انجنیئرز کے اس اقدام پر سخت ردِعمل دیتے ہوئے سی ای او کی ہدایت پر چیف ایچ آر افسر کو احتجاج میں شامل انجنیئرز کے خلاف کارروائی کا حکم دیا ہے۔ سی ای او نے واضح کیا ہے کہ فلائٹ آپریشن میں رکاوٹ پیدا کرنے والوں کے خلاف سخت ایکشن لیا جائے گا۔

ترجمان پی آئی اے کا کہنا ہے کہ صورتحال سے نمٹنے کے لیے متبادل انجینئرنگ خدمات دیگر ایئر لائنز سے حاصل کی جارہی ہیں اور جلد فلائٹ آپریشن بحال کردیا جائے گا۔ ترجمان نے مزید کہا کہ سوسائٹی آف ایئر کرافٹ انجنیئرز کی کوئی قانونی حیثیت نہیں، یہ اقدام دراصل قومی ایئر لائن کی نجکاری کے عمل کو سبوتاژ کرنے کی کوشش ہے۔

ترجمان کا مزید کہنا تھا کہ طیاروں کی سیفٹی کو بہانہ بنا کر منصوبہ بندی کے تحت بیک وقت کام چھوڑنا ایک مذموم عمل ہے، پی آئی اے میں لازمی سروسز ایکٹ نافذ ہے اور ہڑتال یا کام چھوڑنا قانونی طور پر جرم کے زمرے میں آتا ہے، جس پر کارروائی کی جائے گی۔

احتجاج اور انتظامیہ کے درمیان کشیدگی کے باعث فلحال فلائٹ آپریشن بدستور معطل ہے اور ہزاروں مسافر ایئرپورٹس پر انتظار کی کیفیت میں موجود ہیں۔