پاکستان ریلوے کا ریونیو 115 ارب روپے سے تجاوز، روہڑی کراچی ٹریک کے لیے $2.5B کا معاہدہ طے

ملتان میں میڈیا سے گفتگو کرتے ہوئے وفاقی وزیرِ ریلوے نے بتایا کہ گزشتہ ڈیڑھ سال کے دوران کی جانے والی اصلاحات کی بدولت پاکستان ریلوے کا ریونیو 88 ارب روپے سے بڑھ کر 115 ارب روپے کی تاریخی سطح پر پہنچ گیا ہے، جبکہ فریٹ آمدن میں 28 فیصد اضافہ ہوا ہے۔ انہوں نے اعلان کیا کہ کراچی-روہڑی ٹریک کے لیے ایشیائی ترقیاتی بینک (ADB) کے ساتھ ڈھائی ارب ڈالر کا معاہدہ طے پا گیا ہے، جس کی مکمل تعمیر کے بعد کراچی سے ملتان تک  سفر  5 گھنٹے  کی کمی ہوگی ۔

انہوں نے بتایا کہ 15 ستمبر کے بعد اپ گریڈ شدہ ٹرینوں میں پرانی کوچز کی مکسنگ مکمل طور پر بند کر دی جائے گی جبکہ 31 دسمبر کے بعد رولنگ اسٹاک میں تمام ڈمیز کا خاتمہ کر دیا جائے گا۔ ریلوے کے نظام کو جدید بنانے کے لیے ڈیجیٹلائزیشن اور کنٹرول رومز قائم کیے گئے ہیں تاکہ اوور اسپیڈنگ اور ایندھن کے ضیاع کو روکا جا سکے۔ علاوہ ازیں، شیخ زید سے کچلاک تک 56 کلومیٹر ٹریک کی بحالی، موئن جو دڑو ایکسپریس کی اپ گریڈیشن اور ملازمین کے لیے 7 عالمی معیار کے ہسپتالوں کے ٹینڈرز کا عمل مکمل کر لیا گیا ہے جہاں ریلوے ملازمین کو 10 لاکھ روپے تک کے مفت علاج کی سہولت مل سکے گی