پاکستان سمیت 12 ممالک کی شمال مغربی شام میں اسرائیلی فضائی حملے کی شدید مذمت

شمال مغربی شام میں ابو الظہور فوجی فضائی اڈے پر اسرائیل کی جانب سے کیے گئے فضائی حملوں کی پاکستان، ترکیہ، سعودی عرب، الجیریا، انڈونیشیا، اردن، لبنان، ملائیشیا، موریطانیہ، فلسطین، قطر اور صومالیہ کے وزرائے خارجہ نے شدید الفاظ میں مذمت کی ہے۔ 12 مسلم و عرب ممالک کے وزرائے خارجہ کی جانب سے جاری کردہ مشترکہ بیان میں ان حملوں کو کھلی اشتعال انگیزی اور شام کی خودمختاری و علاقائی سالمیت کی سنگین خلاف ورزی قرار دیا گیا ہے۔ اعلامیے میں شام کے بنیادی ڈھانچے کو مسلسل نشانہ بنانے پر گہری تشویش کا اظہار کرتے ہوئے کہا گیا کہ یہ اقدامات خطے میں کشیدگی میں مزید اضافے کا باعث بن سکتے ہیں۔ وزرائے خارجہ نے عالمی برادری سے مطالبہ کیا ہے کہ وہ اس جارحیت کے خلاف واضح اور مضبوط موقف اختیار کرے اور شام کی سیاسی وحدت و آزادی کا احترام یقینی بنائے۔