مریم نواز سے استحکام پاکستان پارٹی کے ارکان قومی اسمبلی کی ملاقات، سیاسی امور پر تبادلہ خیال

لاہور: وزیراعلیٰ پنجاب مریم نواز شریف سے استحکام پاکستان پارٹی (IPP) کے اراکینِ قومی اسمبلی نے اہم ملاقات کی ہے، جس میں ملک کی مجموعی سیاسی صورتحال اور صوبہ پنجاب میں جاری اربوں روپے کے ترقیاتی پراجیکٹس پر تفصیلی تبادلہ خیال کیا گیا۔

ملاقات کرنے والے وفد میں وزیر مملکت برائے اوورسیز پاکستانیز محمد عون چوہدری، ایم این اے گل اصغر خان اور منزہ حسن شامل تھے۔ اجلاس کے دوران ملکی سیاسی استحکام، اقتصادی ترقی اور باہمی تعاون کے ساتھ اتحاد کو آگے بڑھانے پر مکمل اتفاقِ رائے کیا گیا۔

استحکام پاکستان پارٹی کے نمائندوں عون چوہدری، منزہ حسن اور گل اصغر نے پنجاب بھر میں جاری عوام دوست فلاحی و ترقیاتی منصوبوں پر وزیراعلیٰ مریم نواز شریف کی تحرک اور کاوشوں کو سراہا۔ اراکینِ اسمبلی نے بالخصوص ان اضلاع میں جہاں زیرِ زمین پانی کھارا ہے، شہریوں کے لیے پینے کے صاف پانی کی فراہمی کے واٹر فلٹریشن اور سپلائی پراجیکٹس کی تعریف کی۔

ملاقات کے دوران اراکینِ قومی اسمبلی نے آزاد کشمیر کے حالیہ انتخاب میں مسلم لیگ (ن) کی شاندار کامیابی پر وزیراعلیٰ مریم نواز شریف کو مبارکباد پیش کی اور کہا کہ پنجاب میں جاری ترقیاتی کاموں کی گونج آزاد کشمیر تک سنائی دے رہی ہے۔ وزیراعلیٰ مریم نواز شریف نے اتحادی جماعتوں کے ساتھ مل کر عوامی خدمت اور شفافیت کے سفر کو آگے بڑھانے کے عزم کا اعادہ کیا۔