عمران خان کو جیل مینوئل کے مطابق علاج کی سہولتیں ملتی رہیں گی:عطا تارڑ

اسلام آباد: وفاقی وزیرِ اطلاعات و نشریات عطاء اللہ تارڑ نے وزیرِ مملکت برائے داخلہ طلال چوہدری کے ہمراہ پریس کانفرنس کرتے ہوئے کہا ہے کہ بانی پی ٹی آئی کو آئین، قانون اور جیل مینوئل کے مطابق تمام ضروری طبی سہولیات پہلے بھی دی جاتی رہی ہیں اور آئندہ بھی فراہم کی جائیں گی۔

اسلام آباد میں میڈیا سے گفتگو کرتے ہوئے وفاقی وزیر نے کہا کہ بانی پی ٹی آئی کی نجی ہسپتال منتقلی سے متعلق سپریم کورٹ کے فیصلے پر حکومت نظرِ ثانی کی درخواست دائر کر رہی ہے۔ ان کا کہنا تھا کہ یہ ایک قانونی معاملہ ہے جس پر وضاحت ضروری ہے کہ کیا ایسے حقوق تمام قیدیوں کو حاصل ہیں یا نہیں۔ انہوں نے واضح کیا کہ مسلم لیگ (ن) نے کبھی کسی کی بیماری یا صحت پر سیاست نہیں کی، جبکہ ماضی میں پی ٹی آئی رہنماؤں نے مسلم لیگ (ن) کی قیادت کی صحت کو سیاسی بحث کا موضوع بنایا۔

عطاء اللہ تارڑ نے زور دے کر کہا کہ قیدیوں کو طبی سہولیات کی فراہمی ایک قانونی حق ہے اور حکومت اس معاملے میں کسی قسم کا سیاسی رنگ دیے بغیر آئینی اور قانونی تقاضوں کو پورا کرتی رہے گی۔