ڈونلڈ ٹرمپ کا کینیڈین مصنوعات پر 50 فیصد نئے ٹیرف روکنے کا اعلان

واشنگٹن: امریکی صدر ڈونلڈ ٹرمپ نے کینیڈا کے خلاف نافذ کیے جانے والے 50 فیصد نئے تجارتی ٹیرف کو 3 روز کے لیے مؤخر کرنے کا باضابطہ اعلان کر دیا ہے۔

صدر ڈونلڈ ٹرمپ نے اپنے سوشل میڈیا پلیٹ فارم ‘ٹروتھ سوشل’ پر جاری کردہ ایک بیان میں کہا کہ امریکہ اور کینیڈا کے درمیان بنیادی تجارتی معاہدہ طے پا گیا ہے۔ تاہم، اس معاہدے کی حتمی دستاویزات اور دیگر قانونی عمل کو مکمل کرنے کے لیے 50 فیصد ٹیرف کے نفاذ کو فی الحال تین دنوں کے لیے روکا جا رہا ہے۔

اپنے بیان میں صدر ٹرمپ نے اہم انکشاف کرتے ہوئے کہا کہ اس پیشرفت کے بعد سابق امریکی صدر جو بائیڈن کے دورِ حکومت میں منسوخ کیے جانے والے اربوں ڈالر کے “کی اسٹون ایکس ایل پائپ لائن” (Keystone XL Pipeline) منصوبے کو دوبارہ بحال کیے جانے کا قوی امکان ہے۔

واضح رہے کہ امریکی انتظامیہ کی جانب سے کینیڈین مصنوعات پر 50 فیصد اضافی ٹیرف کا اطلاق آج سے ہونا تھا، جس سے دونوں ممالک کے درمیان شدید تجارتی کشیدگی کا خدشہ ظاہر کیا جا رہا تھا۔