وزیر داخلہ کی شہید میجر احسان کی رہائشگاہ آمد، اہلخانہ سے اظہار تعزیت

وفاقی وزیرِ داخلہ محسن نقوی نے میانوالی میں شہید میجر احسان کی رہائش گاہ پر حاضری دی اور شہید کے اہل خانہ سے دلی ہمدردی اور تعزیت کا اظہار کیا۔ وزیرِ داخلہ نے شہید میجر احسان کے درجات کی بلندی کے لیے فاتحہ خوانی کی اور ان کے بچوں کو دلاسہ دیا۔

اس موقع پر محسن نقوی نے شہید میجر احسان کے والد کے بلند حوصلے، جذبے اور صبر کو سراہتے ہوئے کہا کہ میجر احسان نے شمالی وزیرستان میں خوارج (دہشت گردوں) کا انتہائی بہادری اور شجاعت کے ساتھ مقابلہ کرتے ہوئے جامِ شہادت نوش کیا۔ انہوں نے مزید کہا کہ وطنِ عزیز کی سلامتی اور امن کے لیے اپنی جانوں کا نذرانہ پیش کرنے والے شجاع اور بہادر سپوت قوم کا فخر ہیں اور ان کی عظیم قربانیاں کبھی رائیگاں نہیں جائیں گی۔