پاکستان اور روس کے درمیان کلیدی شعبوں میں تعاون اور رابطے جاری رکھنے پر اتفاق

نائب وزیراعظم اور وزیرِ خارجہ سینیٹر محمد اسحاق ڈار سے پاکستان میں متعین روس کے سفیر البرٹ خوریف نے اسلام آباد میں اہم ملاقات کی۔ اس ملاقات کے دوران پاک روس دوطرفہ تعلقات کے مثبت رجحان، حالیہ پیشرفت اور باہمی تعاون پر تفصیلی تبادلہ خیال کیا گیا۔ ملاقات میں نائب وزیراعظم اسحاق ڈار نے دونوں ممالک کے درمیان سفارتی اور اقتصادی تعلقات میں آنے والے مثبت موڑ اور بالخصوص حالیہ پیش رفت کو سراہا۔ انہوں نے تاکید کی کہ باہمی تعلقات کو مزید پائیدار بنانے کے لیے کلیدی شعبوں میں تعاون کے فروغ کے ساتھ ساتھ اعلیٰ سطحی رابطہ کاری اور قیادت کے سطح پر ملاقاتوں کا سلسلہ جاری رہنا چاہیے۔ اس موقع پر نائب وزیراعظم نے پاکستان کے اصولی اور بنیادی موقف کا اعادہ کرتے ہوئے کہا کہ خطے کے کسی بھی تنازع یا اختلافی مسئلے کا پائیدار حل صرف گفتگو، مذاکرات اور سفارت کاری کے ذریعے ہی ممکن ہے۔ انہوں نے خطے میں امن اور استحکام کی خاطر سفارتی رابطے مضبوط بنانے پر زور دیا۔