ہیمپسٹڈ ٹاؤن شپ میں پاکستانی یومِ آزادی کی رنگا رنگ تقریب، کمیونٹی کی بھرپور شرکت

امریکہ کی ریاست نیویارک کی ہیمپسٹڈ ٹاؤن شپ میں سپروائزر جان فیرٹی کے زیرِ انتظام پاکستان کے یومِ آزادی کے موقع پر ایک شاندار اور رنگا رنگ تقریب کا انعقاد کیا گیا۔ تقریب کے انعقاد میں کمشنر برائے کمیونٹی افیئرز زاہد سید نے مرکزی کردار ادا کیا اور ان کی کاوشوں سے تمام کمیونٹی تنظیمیں ایک پلیٹ فارم پر متحد ہوئیں۔ پروگرام میں بچوں کی پرفارمنسز، سنگر نادر خان کے ملی نغموں اور پیانو پر دونوں ممالک کے قومی ترانوں نے حاضرین کے جوش و خروش کو دوبالا کر دیا۔ آعیزہ عرفان اور ثانیہ نعیم کی میزبانی میں سجے اس پروگرام میں نمایاں خدمات پر شخصیات کو اعزازات سے نوازا گیا جبکہ روایتی پاکستانی پکوانوں سے مہمانوں کی تواضع کی گئی۔ سپروائزر جان فیرٹی نے پاکستانی برادری کے ساتھ مل کر جشن منایا اور یہ تقریب پاک امریکہ تعلقات و ثقافتی اتحاد کا روشن ثبوت بن گئی۔