چین نے انٹرنیٹ سیٹلائٹس کی نئی کھیپ خلا میں بھیج دی

چین نے اپنے جنوبی جزیرے ہائی نان میں واقع تجارتی خلائی جہاز لانچ مرکز سے لو-ارتھ آربٹ (کم مدار) کے لیے انٹرنیٹ سیٹلائٹس کی نئی کھیپ کامیابی سے خلا میں روانہ کر دی ہے۔ عالمی میڈیا کی رپورٹ کے مطابق، یہ انٹرنیٹ سیٹلائٹس کا 24 واں گروپ تھا جسے چینی وقت کے مطابق اتوار کی دوپہر 12 بج کر 10 منٹ پر لانگ مارچ-12 کیریئر راکٹ کے ذریعے داغا گیا۔

خلائی مرکز کے حکام کے مطابق راکٹ کی پرواز مکمل طور پر کامیاب رہی اور تمام سیٹلائٹس بحفاظت اپنے مقررہ مدار میں داخل ہو گئے ہیں۔ چین کی جانب سے خلا میں انٹرنیٹ نیٹ ورک اور سیٹلائٹ براڈبینڈ خدمات کی کوریج کو بڑھانے کے لیے اس سلسلے کی پروازیں باقاعدگی سے جاری ہیں۔