برآمدات کی ترسیل میں خلل کسی صورت ملکی مفاد میں نہیں، احسن اقبال

وفاقی وزیر پلاننگ اینڈ ڈویلپمنٹ احسن اقبال نے ٹرانسپورٹرز سے جاری ہڑتال فوری ختم کر کے مذاکرات کی میز پر آنے کی اپیل کی ہے۔ سوشل میڈیا پر جاری اپنے بیان میں انہوں نے کہا کہ حکومت ٹرانسپورٹرز کے تمام مسائل اور مطالبات پر بیٹھ کر بات چیت کرنے کے لیے تیار ہے، کیونکہ ہڑتال کسی مسئلے کا حل نہیں۔ احسن اقبال نے خبردار کیا کہ ہڑتال کے باعث ملکی برآمدات کی ترسیل میں شدید خلل پڑ رہا ہے اور برآمد کنندگان کے آرڈرز منسوخ ہونے کے خدشات پیدا ہو گئے ہیں۔ ایک برآمد کنندہ کا حوالہ دیتے ہوئے انہوں نے بتایا کہ ہڑتال کی وجہ سے تقریباً ایک ملین ڈالر کے ایکسپورٹ آرڈرز خطرے میں پڑ چکے ہیں۔ انہوں نے اس بات پر زور دیا کہ پاکستان کو اس وقت ایک ایک ڈالر کی اشد ضرورت ہے، لہٰذا قومی مفاد کو مدنظر رکھتے ہوئے برآمدات کی راہ میں رکاوٹ بننے والے احجاجی طریقوں سے گریز کیا جائے۔