امریکا کا چین پر ٹیرف سے بچنے کے لیے بڑے پیمانے پر تجارتی دھوکے کا الزام

امریکی صدارتی مستشار پیٹر نوارو کی جانب سے تیار کردہ ایک مفصل رپورٹ کے بعد وائٹ ہاؤس نے الزام عائد کیا ہے کہ چین امریکی ٹیرف سے بچنے کے لیے بڑے پیمانے پر تجارتی دھوکہ دہی میں ملوث ہے۔ رپورٹ کے مطابق چین اپنے سامان پر دوبارہ لیبلنگ، نئی پیکنگ اور فرضی رسیدوں کے ذریعے بھارت، کینیڈا، میکسیکو، اسرائیل اور یورپی یونین سمیت 40 سے زائد ممالک کے راستے امریکی مارکیٹ میں ترسیل کر رہا ہے۔ اس غیر قانونی عمل سے امریکا کو سالانہ 40 سے 303 ارب ڈالر تک کا نقصان پہنچ رہا ہے جبکہ تقریباً ساڑھے 4 لاکھ ملازمتیں متاثر ہوئی ہیں۔

صدر ڈونلڈ ٹرمپ نے اس رپورٹ کو اپنے سوشل میڈیا اکاؤنٹ پر شیئر کیا ہے۔ رپورٹ میں واضح کیا گیا ہے کہ چین سے امریکا براہِ راست درآمدات میں کمی کے ساتھ ہی ان درمیانی ممالک سے درآمدات میں غیر معمولی اضافہ ریکارڈ کیا گیا۔ ذرائع کے مطابق جن ممالک کے ذریعے سامان بھیجا جا رہا ہے ان میں پاکستان شامل نہیں ہے۔ ٹرمپ انتظامیہ نے اب ان تمام قانونی خامیوں اور غیر قانونی راستوں کو بند کرنے پر اپنی توجہ مرکوز کر لی ہے۔