صدر ٹرمپ نے مذاقاً آبنائے ہرمز کو امریکی علاقہ قرار دیا: وائٹ ہاؤس

وائٹ ہاؤس کی جانب سے جاری کردہ ایک وضاحتی بیان میں کہا گیا ہے کہ امریکی صدر ڈونلڈ ٹرمپ نے ایران کے ساتھ ممکنہ جنگ کے بعد ‘آبنائے ہرمز’ کو امریکی علاقہ قرار دینے سے متعلق بیان صرف ایک مذاق کے طور پر دیا تھا۔ امریکی اخبار کے صحافی برائن شوارٹز کی سوشل میڈیا پوسٹ کے مطابق وائٹ ہاؤس کے ایک سینئر عہدیدار نے تصدیق کی ہے کہ صدر ٹرمپ نے اس نوعیت کے کسی بھی باقاعدہ اقدام کے لیے اپنے کسی مشیر یا اعلیٰ حکام کے ساتھ نہ تو کوئی ملاقات کی ہے اور نہ ہی کوئی بات چیت کی ہے۔

وائٹ ہاؤس کا کہنا ہے کہ صدر ٹرمپ نیویارک میں اپنی تقریر کے دوران غیر رسمی انداز میں گفتگو کر رہے تھے۔ تاہم موقع پر موجود صحافی برائن شوارٹز کے مطابق، یہ جملہ ادا کرنے کے بعد صدر ٹرمپ مسکرائے تو ضرور تھے، لیکن ان کے تاثرات سے ایسا ظاہر ہو رہا تھا جیسے وہ اپنی بات پر قائم ہوں اور اس کی سچائی پر زور دے رہے ہوں۔ واضح رہے کہ صدر ڈونلڈ ٹرمپ کے اس متنازع بیان کے بعد عالمی سطح پر اور بالخصوص خلیجی خطے کی صورتحال کے حوالے سے بحث چِھڑ گئی تھی۔