ڈیجیٹل ادائیگیوں کے فروغ سے ریٹیل ڈیجیٹل ٹرانزیکشنز 12 ارب تک پہنچ گئیں: گورنر اسٹیٹ بینک جمیل احمد

گورنر اسٹیٹ بینک آف پاکستان جمیل احمد نے کہا ہے کہ ملک میں ڈیجیٹل ادائیگیوں کے فروغ سے ریٹیل ڈیجیٹل ٹرانزیکشنز کی تعداد 10 ارب سے بڑھ کر 12 ارب تک پہنچ گئی ہے، جو زیادہ دستاویزی، شفاف اور مؤثر معیشت کی جانب ایک اہم پیش رفت ہے۔ ان خیالات کا اظہار انہوں نے اسٹیٹ بینک کی تقریب کے دوران کیا۔ گورنر اسٹیٹ بینک نے واضح کیا کہ مالی شمولیت کے فروغ اور معاشرے کے ہر طبقے کو باضابطہ مالی نظام تک رسائی فراہم کرنا اسٹیٹ بینک کی اولین ترجیح ہے، جس کے لیے متعدد عملی اقدامات کیے جا چکے ہیں۔

انہوں نے مزید بتایا کہ عام شہریوں تک سرمایہ کاری کے مواقع پہنچانے، اسے آسان، محفوظ اور شفاف بنانے کے لیے ‘انویسٹ پاک’ کا آغاز کیا گیا ہے جو مستقبل میں اہم کردار ادا کرے گا۔ گورنر اسٹیٹ بینک کا کہنا تھا کہ مرکزی بینک اس وقت اسلامک بینکنگ، گرین فنانسنگ اور جدید مالی ٹیکنالوجی (فن ٹیک) کے فروغ کے لیے متحرک ہے تاکہ پاکستان کا مالی نظام محفوظ، مضبوط اور ہر شہری کی دسترس میں ہو۔ ان کا مزید کہنا تھا کہ آزادی کی حقیقی روح معاشی خود انحصاری، مضبوط اداروں، قانون کی پاسداری اور قومی یکجہتی میں مضمر ہے، اور ایک مضبوط و خوشحال پاکستان کی تعمیر کے سفر میں ادارے کے افسران اور ملازمین کی محنت ہی بنیادی قوت ہے