امریکی صدر ٹرمپ کا درآمدی ڈرونز پر 100 فیصد تک ٹیرف عائد کرنے کا اعلان

امریکی صدر ڈونلڈ ٹرمپ نے قومی سلامتی کو درپیش خطرات کے پیشِ نظر امریکا میں درآمد کیے جانے والے تمام بغیر پائلٹ ڈرونز (Unmanned Drones) اور ان کے پرزہ جات پر 100 فیصد تک اضافی ٹیرف عائد کرنے کا باضابطہ اعلان کر دیا ہے۔ وائٹ ہاؤس سے جاری کردہ بیان کے مطابق، 25 کلوگرام سے زائد وزنی ڈرونز نظام، جن میں ایڈوانس تھرمل امیجرز اور ڈاکنگ اسٹیشنز جیسی سیکیورٹی صلاحیتیں موجود ہیں، ان کی درآمد پر 100 فیصد ڈیوٹی لاگو کی جائے گی جبکہ چھوٹے ڈرونز پر 25 فیصد ٹیرف لاگو ہوگا۔ نئی ٹیرف پالیسی کی زیادہ تر شقوں پر عملدرآمد کا آغاز 3 ستمبر سے ہوگا۔

وائٹ ہاؤس کا کہنا ہے کہ اس سخت فیصلے کا بنیادی مقصد امریکا میں ڈرونز اور ان کے اہم پرزہ جات کی مقامی سطح پر پیداوار کو تیز کرنا اور غیر ملکی سپلائی چینز پر انحصار کو کم سے کم کرنا ہے۔ واضح رہے کہ یہ اقدام ایک ایسے وقت میں سامنے آیا ہے جب گزشتہ ہفتے چین نے بھی واشنگٹن کی پابندیوں کے جواب میں امریکا کو ڈرونز کی برآمدات روکنے اور 6 امریکی کمپنیوں کو بلیک لسٹ کرنے کا اعلان کیا تھا۔ امریکا کی جانب سے چین اور 59 دیگر ممالک پر عائد کردہ حالیہ نئے ٹیرف کے بعد اس فیصلے سے دونوں معاشی طاقتوں کے درمیان جاری تجارتی اور تکنیکی تناؤ مزید شدت اختیار کر گیا ہے۔