امریکی وزیر خارجہ کی جانب سے پاکستانی عوام کو یومِ آزادی پر دلی مبارکباد

امریکی وزیر خارجہ مارکو روبیو (Marco Rubio) نے پاکستان کے یومِ آزادی کے پرمسرت موقع پر پاکستانی عوام کو دلی مبارکباد پیش کرتے ہوئے پاکستان اور امریکا کے درمیان دیرینہ تعلقات اور شراکت داری کو مزید مضبوط بنانے کے عزم کا اعادہ کیا ہے۔ اپنے ایک خاص تہنیتی بیان میں امریکی وزیر خارجہ نے کہا کہ پاکستان اور امریکا کے درمیان علاقائی ثالثی، معدنیات، توانائی اور انسدادِ دہشت گردی کے اہم شعبوں میں مسلسل تعاون جاری ہے اور دونوں ممالک کے باہمی اشتراکِ عمل سے عوام کو حقیقی معنوں میں فوائد حاصل ہو رہے ہیں۔

مارکو روبیو نے دوطرفہ تعلقات کے دائرہ کار کو وسعت دینے پر زور دیتے ہوئے کہا کہ امریکا اور پاکستان ثقافتی ورثے کے تحفظ، تجارت اور سرمایہ کاری جیسے شعبوں میں بھی باہمی تعاون کو تیزی سے فروغ دے رہے ہیں۔ انہوں نے اس بات کا اعادہ کیا کہ دونوں ممالک کے مابین شراکت داری آئندہ بھی مضبوط رہے گی اور امریکا پاکستان کے ساتھ اپنے اس دیرینہ تعلق کو مزید آگے بڑھانے اور پائیدار روابط قائم رکھنے کے عزم پر قائم ہے۔