کیلیفورنیا اسٹیٹ اسمبلی میں پاک امریکا تعلقات کو خراج تحسین کی تاریخی قرارداد منظور

امریکی ریاست کیلیفورنیا کی اسٹیٹ اسمبلی میں پاک امریکہ دوطرفہ تعلقات کی اہمیت اور وہاں مقیم پاکستانی نژاد امریکی کمیونٹی کی بیش بہا خدمات کو خراجِ تحسین پیش کرنے کے لیے ایک تاریخی قرارداد متفقہ طور پر منظور کر لی گئی ہے۔ یہ اہم قرارداد سینیٹر میلیسا ہرتاڈو کی جانب سے اسمبلی میں پیش کی گئی تھی۔

قرارداد میں کیلیفورنیا کی معاشی، سماجی اور ثقافتی ترقی میں پاکستانی نژاد امریکی کمیونٹی کے کلیدی کردار کو اجاگر کرتے ہوئے تعلیم، صحت اور کاروبار سمیت مختلف شعبوں میں ان کی نمایاں کامیابیوں کو زبردست الفاظ میں سراہا گیا۔ اسٹیٹ اسمبلی نے پاکستان اور ریاست کیلیفورنیا کے درمیان تعلقات کو مزید فروغ دینے اور پاک امریکہ اقتصادی تعاون کی مضبوطی میں پاکستانی نژاد کاروباری شخصیات اور سرمایہ کاروں کی کاوشوں کا اعتراف کیا۔

علاوہ ازیں، قرارداد میں پاکستان اور امریکہ کے دوطرفہ سفارتی و معاشی تعلقات کو نچلی سطح پر فعال اور مضبوط بنانے کے لیے امریکہ میں پاکستان کے سفیر رضوان سعید شیخ کی مسلسل خدمات اور سفارتی کاوشوں کی بھی تعریف کی گئی۔ سفیرِ پاکستان رضوان سعید شیخ نے اس تاریخی قرارداد کی متفقہ منظوری پر سینیٹر میلیسا ہرتاڈو اور کیلیفورنیا اسٹیٹ اسمبلی کا تہہ دل سے شکریہ ادا کیا۔