امریکا اور ایران کا 60 روزہ جنگ بندی میں توسیع پر اتفاق

امریکا اور ایران نے فی الوقت نافذ العمل 60 روزہ جنگ بندی میں توسیع پر بنیادی اتفاق کر لیا ہے، تاہم اس توسیع کی حتمی مدت کا تعین ہونا ابھی باقی ہے۔ ترک خبر رساں ایجنسی ‘انادولو’ کی رپورٹ کے مطابق پاکستانی حکومتی ذرائع نے تصدیق کی ہے کہ دونوں ممالک نے جنگ بندی آگے بڑھانے کی رضامندی سے ثالثوں کو باقاعدہ آگاہ کر دیا ہے۔ موجودہ جنگ بندی کی مقررہ مدت 17 اگست کو ختم ہو رہی ہے۔

رپورٹس کے مطابق واشنگٹن اور تہران کے درمیان توسیع کی آئندہ مدت کو حتمی شکل دینے کے لیے سفارتی پیغامات کا تبادلہ جاری ہے۔ واضح رہے کہ دونوں ممالک نے 17 جون کو ایک 14 نکاتی مفاہمتی یادداشت پر دستخط کیے تھے، جس کے تحت جنگ کے مستقل خاتمے اور امن مذاکرات مکمل کرنے کے لیے 60 دن کا وقت مقرر کیا گیا تھا۔ اس معاہدے میں آبنائے ہرمز کو تجارتی جہاز رانی کے لیے کھلا رکھنے کی شق بھی شامل تھی، تاہم اہم نکات پر مبہم تحریر کے باعث دونوں فریقین ایک دوسرے پر مسلسل معاہدے کی پاسداری نہ کرنے کے الزامات عائد کرتے رہے ہیں۔