صدر ٹرمپ ایران کیخلاف جنگ میں شدید مشکلات سے دوچار: میڈیا رپورٹ

امریکی صدر ڈونلڈ ٹرمپ ایران کے خلاف جاری جنگ کے چھٹے ماہ میں انتہائی سخت اور پیچیدہ سیاسی و عسکری صورتحال سے دوچار ہیں، جہاں انہیں یا تو ایران اور عمان کے درمیان آبنائے ہرمز سے متعلق مجوزہ عبوری معاہدہ قبول کرنا ہوگا یا پھر ایران کے خلاف عسکری کارروائی میں مزید شدت لانی ہوگی۔

خبر رساں ادارے ‘رائٹرز’ کے مطابق مجوزہ عبوری معاہدے کے تحت ایران کو آبنائے ہرمز میں بحری آمدورفت پر کچھ محدود نگرانی یا کردار مل سکتا ہے، تاہم امریکی وزیرِ خارجہ مارکو روبیو (Marco Rubio) نے اس موقف کو سختی سے مسترد کرتے ہوئے کہا ہے کہ یہ اہم عالمی آبی گزرگاہ مکمل طور پر آزاد اور کسی بھی ایک ملک کے تسلط يا کنٹرول سے باہر رہنی چاہیے۔

تجزیہ کاروں کے مطابق طویل ہوتی جنگ کے باعث امریکہ میں ایندھن کی بڑھتی ہوئی قیمتوں، عوام میں بڑھتی ہوئی مخالفت اور ڈونلڈ ٹرمپ کی گرتی ہوئی مقبولیت نے وائٹ ہاؤس کے لیے فیصلے انتہائی دشوار بنا دیے ہیں۔ اگر امریکہ فضائی حملوں میں مزید شدت لاتا ہے تو اس سے سیاسی خطرات شدید تر ہو سکتے ہیں، جبکہ موجودہ حالات پر جمود برقرار رکھنے سے اس تنازع کے ختم ہونے کا کوئی امکان دکھائی نہیں دیتا۔

دفاعی اور بین الاقوامی امور کے ماہرین کا ماننا ہے کہ امریکہ اب تک اس جنگ میں اپنے بنیادی اور اہم اہداف حاصل کرنے میں ناکام رہا ہے، جبکہ دوسری جانب چین، روس اور شمالی کوریا اس تنازع کو امریکہ کی دفاعی صلاحیتوں اور بین الاقوامی حکمتِ عملی کے امتحان کے طور پر بغور دیکھ رہے ہیں۔