پیٹ ہیگستھ پر مکمل اعتماد ، واشنگٹن پوسٹ کی رپورٹ جھوٹی ہے: ٹرمپ

امریکی صدر ڈونلڈ ٹرمپ نے اپنے وزیرِ دفاع پیٹ ہیگستھ (Pete Hegseth) پر مکمل اعتماد کا اظہار کرتے ہوئے ان کی برطرفی یا کارکردگی سے متعلق گردش کرنے والی تمام خبروں کو یکسر مسترد اور بے بنیاد قرار دے دیا ہے۔

سوشل میڈیا پر جاری اپنے ایک بیان میں صدر ٹرمپ نے کہا کہ پیٹ ہیگستھ بطور وزیرِ دفاع شاندار اور بہترین کارکردگی کا مظاہرہ کر رہے ہیں، جبکہ واشنگٹن پوسٹ میں شائع ہونے والی رپورٹ مکمل طور پر من گھڑت اور جھوٹی ہے۔ انہوں نے واشنگٹن پوسٹ کی رپورٹنگ پر شدید تنقید کرتے ہوئے اسے “غداری کے مترادف” قرار دیا۔

ڈونلڈ ٹرمپ نے اپنے بیان میں ملٹری اور انتظامی کامیابیوں کا ذکر کرتے ہوئے دعویٰ کیا کہ ایران کی جوہری صلاحیت کو شدید نقصان پہنچایا گیا ہے اور وینزویلا سے متعلق آپریشن ایک دن سے بھی کم وقت میں مکمل کرتے ہوئے نکولس مادورو کو انصاف کے کٹہرے میں لانے میں اہم پیش رفت کی گئی ہے۔ صدر ٹرمپ نے مزید کہا کہ امریکی فوج میں نئی بھرتیاں تاریخی سطح تک پہنچ چکی ہیں اور پیٹ ہیگستھ نے ڈی ای آئی (تنوع، مساوات اور شمولیت) کی پالیسی کو ختم کر کے فوج کو ازسرِنو مضبوط اور بہتر بنانے میں کلیدی کردار ادا کیا ہے۔