آئی ایس پی آر سمر انٹرن شپ پروگرام؛ مفتی عبد الرحیم کا نوجوانوں کو خاص پیغام

آئی ایس پی آر (ISPR) کے زیرِ اہتمام سمر انٹرن شپ پروگرام 2026 کے تحت الغزالی یونیورسٹی کے چانسلر مفتی عبد الرحیم کے ساتھ ایک خصوصی نشست کا انعقاد کیا گیا۔ اس ویبنار/نشست میں ملک بھر کے 21 مختلف اسٹیشنز سے 6 ہزار 150 سے زائد طلبہ و طالبات نے شرکت کی، جہاں نظریۂ پاکستان، ریاست کی اہمیت اور قومی سلامتی پر تفصیلی تبادلہ خیال کیا گیا۔

مفتی عبد الرحیم نے اپنے خطاب میں فتنۃ الخوارج کے خلاف سیکیورٹی فورسز کی قربانیوں کو عظیم دینی و قومی فریضہ قرار دیتے ہوئے کہا کہ اسلام امن اور بے گناہ انسانوں کی حفاظت کا درس دیتا ہے۔ انہوں نے خواتین کو معاشرے اور دفاعِ وطن کے لیے مؤثر کردار ادا کرنے کی تاکید کرتے ہوئے غزوۂ اُحد میں حضرت اُمِّ عمارہؓ کی جرأت و بسالت کو مشعلِ راہ قرار دیا۔