اسحاق ڈار کی شاہِ اردن سے ملاقات، فلسطین اور مشرقِ وسطیٰ کی صورتحال پر تبادلۂ خیال

اردن کے دارالحکومت عمان میں یروشلم سے متعلق منعقدہ وزارتی اجلاس کے موقع پر نائب وزیراعظم اور وزیر خارجہ سینیٹر اسحاق ڈار نے دیگر وزرائے خارجہ اور اعلٰی شخصیات کے ہمراہ ہاشمی مملکتِ اردن کے فرمانروا شاہ عبداللہ دوم بن الحسین سے ملاقات کی۔

ملاقات کے دوران نائب وزیراعظم اسحاق ڈار نے صدرِ مملکت آصف علی زرداری، وزیراعظم محمد شہباز شریف، چیف آف ڈیفنس فورسز فیلڈ مارشل سید عاصم منیر اور پاکستان کے عوام کی جانب سے نیک تمناؤں اور خیرسگالی کے پیغامات شاہ عبداللہ دوم تک پہنچائے۔ اس موقع پر اردن کے فرمانروا شاہ عبداللہ دوم نے بھی پاکستان کی قیادت اور عوام کے لیے نیک خواہشات اور دعاؤں کا اظہار کیا۔

وزیر خارجہ اسحاق ڈار نے بیت المقدس میں مسلم اور مسیحی مقدس مقامات کی اردن کی جانب سے مستقل سرپرستی اور خطے میں امن و استحکام کے لیے ہاشمی مملکت کی مسلسل کاوشوں کو سراہا۔ ملاقات میں فلسطین کی موجودہ صورتحال، مشرقِ وسطیٰ کی تازہ ترین پیشرفت اور دیگر اہم علاقائی و باہمی دلچسپی کے امور پر تفصیلی گفتگو کی گئی۔