5 اگست 2019ء کے بھارتی اقدامات غیر قانونی اور یکطرفہ تھے، عاصم افتخار

اقوام متحدہ میں پاکستان کے مستقل مندوب عاصم افتخار نے سلامتی کونسل کے اجلاس سے خطاب کرتے ہوئے کہا ہے کہ 5 اگست 2019ء کے بھارتی اقدامات مکمل طور پر غیر قانونی اور یکطرفہ تھے۔ عالمی امن و سلامتی کو دہشت گردی سے لاحق خطرات کے موضوع پر ہونے والے اس اجلاس میں انہوں نے زور دیا کہ دہشت گردی کی تمام شکلوں، بالخصوص ریاستی دہشت گردی کا خاتمہ عالمی امن کے لیے انتہائی ضروری ہے، جس کی بدترین مثال مقبوضہ کشمیر میں بھارتی مظالم ہیں۔

پاکستانی مندوب نے افغانستان سے درپیش سیکیورٹی چیلنجز پر بات کرتے ہوئے کہا کہ افغانستان اس وقت دہشت گرد گروہوں کی محفوظ پناہ گاہ بنا ہوا ہے، جہاں سے کالعدم ٹی ٹی پی، بی ایل اے اور داعش خراسان جیسی تنظیمیں اپنی کارروائیاں چلا رہی ہیں۔ انہوں نے واضح کیا کہ طالبان حکومت افغان سرزمین کے دہشت گردی کے لیے استعمال کو روکنے کی پابند اور جوابدہ ہے۔ عاصم افتخار نے عالمی برادری سے مطالبہ کیا کہ دہشت گردوں کے مالی و عسکری وسائل، کرپٹو کرنسی اور دیگر ورچوئل اثاثوں تک رسائی کو فوری طور پر روکا جائے۔