مریم نواز سے جائیکا کے صدر کی ملاقات، مختلف شعبوں میں تعاون بڑھانے پر اتفاق

وزیراعلیٰ پنجاب مریم نواز شریف سے جاپان انٹرنیشنل کوآپریشن ایجنسی (JICA) کے صدر ڈاکٹر اکیہیکو تاناکا نے ایک اعلیٰ سطحی وفد کے ہمراہ لاہور میں ملاقات کی، جس میں پنجاب میں جاری ترقیاتی منصوبوں، اربن انفراسٹرکچر اور مستقبل کی شراکت داری پر تفصیلی تبادلہ خیال کیا گیا۔ ملاقات کے دوران فیصل آباد میں جاری واٹر سپلائی اور سینی ٹیشن منصوبوں کی پیش رفت کا تفصیلی جائزہ لیا گیا، جبکہ وزیراعلیٰ نے فیصل آباد ماڈل کو پنجاب کے دیگر اضلاع تک وسعت دینے کی خواہش ظاہر کی۔ دونوں رہنماؤں نے تعلیم، صحت، غذائیت، ٹیکنالوجی کی منتقلی اور خواتین کو بااختیار بنانے کے شعبوں میں تعاون کو مزید مضبوط کرنے پر اتفاق کیا۔ وزیراعلیٰ مریم نواز نے جائیکا کے تعاون اور تربیتی پروگراموں کی تعریف کی، جبکہ جائیکا کے صدر ڈاکٹر اکیہیکو تاناکا نے پنجاب حکومت کے ساتھ فلاحی اور انسانی وسائل کی ترقی کے منصوبوں میں مکمل تعاون جاری رکھنے کے عزم کا اعادہ کیا۔