5 اگست 2019 ہمیشہ ایک سیاہ دن کے طور پر یاد رکھا جائے گا، حافظ نعیم

امیر جماعتِ اسلامی پاکستان حافظ نعیم الرحمٰن نے یومِ استحصالِ کشمیر کے موقع پر اپنے بیان میں کہا ہے کہ 05 اگست 2019 کا دن تحریکِ آزادیِ کشمیر کی تاریخ میں ہمیشہ ایک سیاہ دن کے طور پر یاد رکھا جائے گا۔ انہوں نے کہا کہ مودی حکومت کی جانب سے اقوامِ متحدہ کی سلامتی کونسل کی قراردادوں کو پامال کرتے ہوئے مقبوضہ جموں و کشمیر کی خصوصی حیثیت کا خاتمہ بین الاقوامی قوانین کی صریح خلاف ورزی تھا، جسے 07 برس مکمل ہو چکے ہیں، تاہم ان یکطرفہ اقدامات سے کشمیری عوام کے آزادی کے عزم میں کوئی کمی نہیں آئی۔ حافظ نعیم الرحمٰن نے مزید کہا کہ بھارت گزشتہ 78 برسوں سے مقبوضہ وادی میں مظالم ڈھانے کے باوجود کشمیریوں کی جذبہِ حریت کو نہیں دبا سکا۔ انہوں نے دہرایا کہ کشمیر پاکستان کی شہ رگ ہے اور پاکستانی عوام اپنے کشمیری بھائیوں کی مکمل کامیابی تک ان کی اخلاقی و سیاسی حمایت جاری رکھیں گے۔