صدر ٹرمپ کی فنڈ ریزنگ تقریب سے چند گھنٹے قبل گالف کلب سے مسلح شخص گرفتار

امریکی ریاست کیلیفورنیا میں صدر ڈونلڈ ٹرمپ کی فنڈ ریزنگ تقریب سے چند گھنٹے قبل ‘ٹرمپ نیشنل گالف کلب’ کے احاطے سے ایک ۳۸ سالہ مسلح شخص، جینین جان ٹیلے کو گرفتار کر لیا گیا۔ وفاقی سیکیورٹی اہلکاروں نے ملزم کو گالف کلب کی تصاویر بناتے اور سیکیورٹی انتظامات کا جائزہ لیتے ہوئے مشکوک پایا، جس پر اسے فوری طور پر حراست میں لے لیا گیا۔ تلاشی کے دوران ملزم کی جیب سے ایک بھرا ہوا میگزین اور گاڑی سے پستول و اضافی گولیاں برآمد ہوئیں۔ بعد ازاں ایف بی آئی اور مقامی پولیس نے ملزم کے گھر پر چھاپہ مار کر ۴۵ پستول، ایک غیر قانونی رائفل، باڈی آرمر، بڑی تعداد میں گولہ بارود اور ۲ ریڈیو سگنل ڈیوائسز ضبط کر لیں۔ پولیس کے مطابق ملزم پہلے سے ڈکیتی کے ایک مقدمے میں زیرِ تفتیش ہے، تاہم ابتدائی تحقیقات کے مطابق فی الحال صدر ٹرمپ یا عوام کو کسی براہِ راست خطرے کے شواہد نہیں ملے۔