آزاد کشمیر انتخابات کا دوسرا مرحلہ: 21 نشستوں پر پولنگ کل، 12 لاکھ سے زائد ووٹرز شامل

آزاد جموں و کشمیر قانون ساز اسمبلی کی 21 انتخابی نشستوں پر پولنگ کل 02 اگست 2026 کو ہوگی، جس کے لیے الیکشن کمیشن نے تمام تر انتظامات مکمل کرتے ہوئے عملے اور انتخابی سامان کی ترسیل شروع کر دی ہے۔ الیکشن کمیشن کے مطابق ان 21 نشستوں پر 12 لاکھ سے زائد رجسٹرڈ ووٹرز اپنا حقِ رائے دہی استعمال کریں گے، جن میں مظفرآباد ڈویژن کی 09 نشستوں پر 8,09,621 جبکہ مہاجرین مقیم پاکستان کی 12 نشستوں پر ووٹنگ ہوگی۔ ان نشستوں پر 25 رجسٹرڈ سیاسی جماعتوں اور آزاد امیدواروں سمیت مجموعی طور پر 351 امیدوار مدِمقابل ہیں۔ سیکیورٹی کو فول پروف بنانے کے لیے مظفرآباد ڈویژن کے 1,483 پولنگ اسٹیشنز پر سیکیورٹی اہلکار تعینات کر دیے گئے ہیں، جبکہ حلقہ ایل اے 28، ایل اے 29 اور ایل اے 31 کو انتہائی حساس قرار دیا گیا ہے۔ واضح رہے کہ انتخابی شیڈول کے مطابق پونچھ ڈویژن میں پولنگ 10 اگست کو منعقد کی جائے گی۔