امریکی سینٹرل کمانڈ نے آبنائے ہرمز کی بندش کا ایرانی دعویٰ مسترد کر دیا

امریکی سینٹرل کمانڈ (سینٹ کام) نے ایران کی جانب سے آبنائے ہرمز کو بند کیے جانے کے دعوے کو مکمل طور پر مسترد کر دیا ہے۔ سماجی رابطے کی ویب سائٹ ایکس (ٹویٹر) پر جاری کردہ بیان میں سینٹ کام نے واضح کیا کہ آبنائے ہرمز پر ایران کا کوئی کنٹرول نہیں ہے اور یہ اہم بین الاقوامی آبی گزرگاہ تجارتی جہازوں کی آمدورفت کے لیے بدستور کھلی ہے۔ امریکی عسکری حکام کا کہنا ہے کہ گزشتہ 4 ماہ کے دوران ہزاروں جہاز اس راستے سے باحفاظت گزر چکے ہیں۔ اس سے قبل ایرانی حکام نے دعویٰ کیا تھا کہ انہوں نے آبنائے ہرمز سے نکلنے کی کوشش کرنے والے دو جہازوں کو روک لیا ہے جبکہ ان کی فورسز کی مداخلت کے باعث مزید چار آئل ٹینکرز کو واپس لوٹنا پڑا ہے۔