امریکا کا ایرانی ڈرون نیٹ ورک سے متعلق معلومات پر 1 کروڑ 50 لاکھ ڈالر انعام کا اعلان

امریکا نے ایرانی پاسدارانِ انقلاب (IRGC) کے مالیاتی اور سپلائی نیٹ ورک کو نقصان پہنچانے والی معلومات فراہم کرنے پر 1 کروڑ 50 لاکھ ڈالر تک کے انعام کا اعلان کیا ہے۔ امریکی محکمہ خارجہ کے ‘ریوارڈز فار جسٹس’ پروگرام کے تحت یہ انعام بالخصوص ‘کیمیا پارٹ سیوان’ (KIPAS) نامی کمپنی کے مالیاتی ڈھانچے اور سپلائی چین کو بے نقاب کرنے والے شواہد پر دیا جائے گا۔ واشنگٹن کا الزام ہے کہ یہ کمپنی قدس فورس کے لیے ڈرونز کی تیاری، ان کی آزمائش اور تکنیکی پرزہ جات کی خریداری میں مرکزی کردار ادا کرتی رہی ہے۔ اس سلسے میں کمپنی کے 6 اعلیٰ عہدیداروں کے نام بھی جاری کیے گئے ہیں جن پر عراق، یمن اور شام میں ایرانی حمایت یافتہ گروہوں کو ڈرون ٹیکنالوجی کی فراہمی کا الزام ہے۔ امریکی حکام نے وضاحت کی ہے کہ اس اقدام کا مقصد براہِ راست گرفتاریاں نہیں بلکہ پاسدارانِ انقلاب کی مالی قوت کو مفلوج کرنا ہے، جبکہ دوسری جانب ایران نے ماضی کی طرح ان تمام امریکی الزامات کو یکسر مسترد کرتے ہوئے بے بنیاد قرار دیا ہے۔