امریکی مفادات پر حملہ برداشت نہیں، ٹرمپ کا ایران کو سخت جواب دینے کا اعلان

امریکی صدر ڈونلڈ ٹرمپ نے ایران کو سخت جواب دینے کا اعلان کرتے ہوئے کہا ہے کہ امریکی مفادات اور سیکیورٹی فورسز پر کسی بھی قسم کے حملے کو ہرگز برداشت نہیں کیا جائے گا۔ فاکس نیوز کو دیے گئے انٹرویو میں صدر ٹرمپ نے دعویٰ کیا کہ مشرق وسطیٰ میں امریکی فوجی اڈوں کو نشانہ بنانے کی ایرانی بیلسٹک میزائل کوشش کو امریکی دفاعی نظام نے فضا ہی میں کامیابی کے ساتھ ناکام بنا دیا۔ انہوں نے کہا کہ امریکہ اپنے مفادات کے تحفظ کے لیے ہر ممکن کارروائی کرے گا اور ایران کو اس کا سخت جواب دیا جائے گا۔ صدر ٹرمپ نے عراق میں ایرانی حمایت یافتہ گروہوں کو عالمی امن کے لیے “نیا کینسر” قرار دیتے ہوئے بتایا کہ امریکہ اور سعودی عرب نے مل کر ان عسکریت پسندوں کے ٹھکانوں پر مشترکہ کارروائیاں کی ہیں۔