ملک میں ہر تیسرا شہری ہیپاٹائٹس میں مبتلاہے،وفاقی وزیرصحت مصطفیٰ کمال

وفاقی وزیر صحت مصطفیٰ کمال نے انکشاف کیا ہے کہ پاکستان میں اس وقت تقریباً 1 کروڑ 10 لاکھ افراد ہیپاٹائٹس کے مرض میں مبتلا ہیں، جبکہ حکومت نے ملک کو 2030ء تک ہیپاٹائٹس سی سے پاک کرنے کا ہدف مقرر کیا ہے۔ ورلڈ ہیپاٹائٹس ڈے کی مناسبت سے منعقدہ ایک خصوصی تقریب سے خطاب کرتے ہوئے وفاقی وزیر نے بتایا کہ ‘وزیراعظم ہیپاٹائٹس کنٹرول پروگرام’ کے تحت مریضوں کو 68 ہزار روپے مالیت کی ادویات اور 60 ہزار روپے تک کے ضروری ٹیسٹ بالکل مفت فراہم کیے جا رہے ہیں۔

وفاقی وزیر صحت نے کہا کہ پروگرام کے تحت اب تک 21 ہزار شہریوں کی اسکریننگ مکمل کی جا چکی ہے، جن میں سے 1700 افراد میں ہیپاٹائٹس کی تشخیص ہوئی ہے۔ انہوں نے خبردار کیا کہ بروقت تشخیص اور علاج نہ ہونے کی صورت میں ہیپاٹائٹس، لیور کینسر (جگر کے کینسر) جیسی مہلک بیماری کی شکل اختیار کر سکتا ہے۔ اسکریننگ کا یہ عمل ابتدائی طور پر اسلام آباد، گلگت بلتستان اور آزاد کشمیر میں شروع کیا گیا ہے، جسے جلد ہی ملک کے تمام صوبوں تک پھیلایا جائے گا۔ مزید برآں، حکومت ایک نیا قانون متعارف کروا رہی ہے جس کے تحت 12 سال یا اس سے زائد عمر کے افراد کے ایسے تمام طبی پروسیجرز یا سرجری میں، جہاں جلد کو کاٹا جاتا ہو، ایچ آئی وی (ایڈز) اور ہیپاٹائٹس کے ٹیسٹ کروانا لازمی ہوں گے۔

تقریب سے خطاب کرتے ہوئے وفاقی وزیر منصوبہ بندی احسن اقبال نے تشویش کا اظہار کرتے ہوئے کہا کہ پاکستان ہیپاٹائٹس کے پھیلاؤ میں دنیا میں پہلے اور پولیو کے کیسز میں دوسرے نمبر پر ہے، جو کہ ایک قوم کے طور پر ہمارے لیے لمحہ فکر ہے اور اس سلسلے میں نیشنل ہیلتھ ایمرجنسی نافذ کرنے کی ضرورت ہے۔ انتظامی استحکام پر زور دیتے ہوئے انہوں نے کہا کہ سیکرٹریز کی بار بار تبدیلی کے بجائے انہیں کم از کم 2 سے 3 سال تک ایک ہی عہدے پر کام کرنے دیا جانا چاہیے تاکہ صحت کے شعبے کی پالیسیوں اور منصوبوں پر مؤثر عملدرآمد ممکن بنایا جا سکے۔