کوٹلی میں امن و امان برقرار نہ رکھنے پر ڈپٹی کمشنر اور ایس ایس پی معطل

آزاد جموں و کشمیر حکومت نے ضلع کوٹلی میں امن و امان کی بگرتی صورتِ حال اور فرائض میں غفلت برتنے پر سخت انتظامی ایکشن لیتے ہوئے ڈپٹی کمشنر کوٹلی راجہ عمران شاہین اور ایس ایس پی کوٹلی عدیل احمد لنگڑیال کو فوری طور پر عہدوں سے معطل کر دیا ہے۔

سرکاری ذرائع کے مطابق یہ بڑا فیصلہ ضلع میں لا اینڈ آرڈر کی صورتِ حال کو مؤثر انداز میں برقرار رکھنے میں ناکامی اور انتظامی ذمہ داریوں میں عدم توجہی کے باعث عمل میں لایا گیا ہے۔ حکومت کی جانب سے فوری طور پر عثمان صارم کو ضلع کوٹلی کا نیا ڈپٹی کمشنر مقرر کر دیا گیا ہے، اور توقع ظاہر کی جا رہی ہے کہ اس نئی تعیناتی کے ساتھ ہی انتظامی امور کو بہتر بنانے اور علاقے میں امن کی بحالی کے لیے ہنگامی اقدامات کیے جائیں گے۔

ذرائع نے مزید بتایا ہے کہ حکومتی سطح پر یہ واضح پیغام دیا گیا ہے کہ عوام کے جان و مال کا تحفظ اور قانون کی عملداری ریاست کی اولین ترجیح ہے۔ کسی بھی سطح پر افسران کی غفلت يا کوتاہی کو برداشت نہیں کیا جائے گا اور انتظامی کارکردگی کی بہتری کے لیے آئندہ بھی ایسے سخت اقدامات متوقع ہیں۔