سوات اور گردونواح میں 4.8 شدت کے زلزلے کے جھٹکے

خیبر پختونخوا کے ضلع سوات اور اس کے اطراف کے علاقوں میں زلزلے کے شدید جھٹکے محسوس کیے گئے ہیں، جس سے شہریوں میں خوف و ہراس پھیل گیا۔

زلزلہ پیما مرکز کے مطابق زلزلے کی شدت ریکٹر اسکیل پر 4.8 ریکارڈ کی گئی، جبکہ اس کی زیرِ زمین گہرائی 118 کلومیٹر تھی۔ زلزلے کا مرکز افغانستان اور پاکستان کے سرحد سے متصل کوہِ ہندوکش کا پہاڑی سلسلہ بتایا گیا ہے۔ زلزلے کے بعد خوفزدہ شہری کلمۂ طیبہ کا ورد کرتے ہوئے اپنے گھروں اور دفاتر سے کھلے میدانوں میں نکل آئے۔

ابتدائی اطلاعات کے مطابق زلزلے کے باعث کسی جانی یا مالی نقصان کی اطلاع موصول نہیں ہوئی ہے۔ تاہم، کسی بھی ممکنہ ہنگامی صورتحال سے نمٹنے کے لیے ضلعی انتظامیہ اور متعلقہ ادارے صورتحال کا باریک بینی سے جائزہ لے رہے ہیں۔