لاہور ہائیکورٹ: پارکنسن کے مریض ڈاکٹر ملزم کی بعد از گرفتاری ضمانت منظور

لاہور ہائیکورٹ نے پارکنسن کے مرض میں مبتلا ملزم ڈاکٹر افتخار احمد کی بعد از گرفتاری ضمانت 10 لاکھ روپے کے مچلکوں کے عوض منظور کر لی ہے۔ جسٹس محمد امجد رفیق نے 11 صفحات پر مشتمل اہم فیصلے میں قرار دیا ہے کہ ضابطہ فوجداری کی دفعہ 497 کے تحت جسمانی کمزوری ضمانت کی ایک مستقل اور خودمختار قانونی بنیاد ہے، جو صرف بیماری تک محدود نہیں ہے۔ عدالت نے واضح کیا کہ اگر جیل رپورٹ میں کسی قیدی کی کمزوری یا معذوری ثابت ہو جائے تو عدالت بیماری کی شدت جانچے بغیر بھی انسانی وقار اور بنیادی حقوق کے تحت ضمانت دے سکتی ہے۔ فیصلے میں ملزم کو ہدایت کی گئی ہے کہ وہ اپنے پاسپورٹ جمع کروائے اور عدالت کی اجازت کے بغیر دائرہ اختیار سے باہر نہ جائے۔