مصنوعی ذہانت 5 برس میں انسانی ذہانت سے آگے نکل سکتی ہے: ایلون مسک کا انتباہ

ٹیسلا اور اسپیس ایکس کے سربراہ ایلون مسک نے خبردار کیا ہے کہ مصنوعی ذہانت (اے آئی) میں تیز رفتار پیشرفت کے باعث یہ ٹیکنالوجی آئندہ پانچ برسوں میں تمام انسانوں کی مجموعی ذہانت سے بھی آگے نکل جائے گی۔ ایک انٹرویو میں انہوں نے کہا کہ آئندہ دہائی میں انسانوں کے لیے اس ٹیکنالوجی پر کنٹرول برقرار رکھنا ایک چیلنج بن جائے گا کیونکہ اے آئی تقریباً ہر شعبے میں انسانوں سے بہتر کارکردگی دکھانے کے قابل ہو جائے گی۔ تاہم ایلون مسک نے اس امید کا اظہار بھی کیا کہ اگر ممکنہ خطرات کا پہلے سے تدارک کیا جائے تو یہ ٹیکنالوجی بے مثال خوشحالی کے ایک نئے دور کا آغاز بھی کر سکتی ہے۔ انہوں نے تجویز دی کہ بڑی اے آئی کمپنیاں صرف حکومتی قوانین پر انحصار کرنے کے بجائے باقاعدگی سے ایک دوسرے کے سسٹمز کا سکیورٹی تجزیہ کریں اور اپنے ماڈلز جاری کرنے سے قبل ممکنہ خطرات پر آپس میں تعاون بڑھائیں۔