پی پی ترجمان الفاظ کا چناؤ درست کریں اور بڑوں کی عزت کرنا سیکھیں: عظمیٰ بخاری

وزیر اطلاعات پنجاب عظمیٰ بخاری نے پیپلز پارٹی کے ترجمانوں اور قیادت کے حالیہ بیانات پر سخت ردعمل دیتے ہوئے کہا ہے کہ سیاسی مخالفین کو اپنے الفاظ کا چناؤ درست کرنا چاہیے اور بڑوں کی عزت کرنا سیکھنی چاہیے۔ انہوں نے کہا کہ پیپلز پارٹی کے ترجمان مسلسل رائیونڈ کو مذاق بنانے اور سینئر سیاسی رہنماؤں کی تضحیک کرنے میں مصروف ہیں، جو کہ انتہائی نا مناسب رویہ ہے۔ چیئرمین پیپلز پارٹی کو مخاطب کرتے ہوئے عظمیٰ بخاری کا کہنا تھا کہ ’بلاول صاحب آسمان سے اترے اوتار نہیں ہیں‘، وہ پنجاب کے شہروں کے نام لے کر مسلسل غلط بیانی اور جھوٹا پروپیگنڈا کر رہے ہیں۔ صوبائی وزیر نے مطالبہ کیا کہ پی پی پی قیادت اور ترجمان سیاسی اختلافات کو شائستگی کے دائرے میں رکھیں اور ذاتی حملوں و تضحیک آمیز رویے سے گریز کریں۔