صرف بینک اکاؤنٹ میں رقم منتقلی انسانی سمگلنگ کا ثبوت نہیں، لیبیا کشتی حادثے کے ملزم کی ضمانت منظور

لاہور ہائیکورٹ نے لیبیا کشتی حادثہ اور انسانی سمگلنگ کیس کے ملزم محمد طاہر کی 5 لاکھ روپے کے مچلکوں کے عوض بعد از گرفتاری ضمانت منظور کر لی ہے۔ جسٹس محمد امجد رفیق کی جانب سے جاری کردہ 10 صفحات پر مشتمل تحریری فیصلے میں قرار دیا گیا ہے کہ صرف کسی شخص کے بینک اکاؤنٹ میں رقم کی منتقلی انسانی سمگلنگ میں ملوث ہونے کا حتمی ثبوت نہیں، بلکہ یہ محض ایک مشکوک صورتحال پیدا کر سکتی ہے۔ عدالت نے ایف آئی اے کی تفتیش پر شدید تنقید کرتے ہوئے کہا کہ محض شبہ یا قیاس آرائی کافی نہیں، بلکہ استغاثہ کو واٹس ایپ چیٹس، کال ریکارڈ اور ڈیجیٹل شواہد جیسے آزاد اور ٹھوس ثبوتوں کے ذریعے ملزم کے دانستہ اور فعال کردار کو ثابت کرنا ہوگا۔ فیصلے میں مزید کہا گیا کہ اپریل 2026 کے لیبیا کشتی حادثے کے اس مقدمے میں ملزم کے خلاف شواہد مزید تفتیش کے زمرے میں آتے ہیں، جبکہ بین الاقوامی سطح پر قانونی معاونت نہ لینا تفتیشی ادارے کی ناکامی ہے۔ عدالت نے واضح کیا کہ یہ آبزرویشنز ابتدائی نوعیت کی ہیں اور ٹرائل کے حتمی فیصلے پر اثر انداز نہیں ہوں گی