خیبر پختونخوا میں بارشوں اور فلش فلڈ سے تباہی، 28 افراد جاں بحق، 47 گھر متاثر

خیبر پختونخوا میں 19 جولائی سے جاری تیز بارشوں اور فلش فلڈ کے نتیجے میں مختلف حادثات اور سیلابی ریلوں کے باعث 28 افراد جاں بحق اور 29 زخمی ہو گئے۔ ترجمان پی ڈی ایم اے کے مطابق جاں بحق افراد میں 15 بچے، 10 مرد اور 3 خواتین شامل ہیں، جبکہ مجموعی طور پر 47 مکانات کو نقصان پہنچا جن میں سے 10 گھر مکمل طور پر منہدم ہو گئے۔ متاثرہ اضلاع میں پشاور، نوشہرہ، خیبر، باجوڑ، چترال اور وزیرستان سمیت دیگر علاقے شامل ہیں۔ پی ڈی ایم اے کا ایمرجنسی آپریشن سینٹر فعال کر دیا گیا ہے اور متاثرین میں امدادی سامان کی فراہمی تیز کرنے کی ہدایت جاری کرتے ہوئے شہریوں کو غیر ضروری سفر اور سیاحتی مقامات سے گریز کی اپیل کی گئی ہے۔