نواز شریف آج میرپور میں انتخابی جلسے سے خطاب کریں گے

آزاد جموں و کشمیر کے عام انتخابات 2026ء کے پہلے مرحلے کے سلسلے میں میرپور ڈویژن میں پولنگ 27 جولائی کو منعقد کی جائے گی، جس کے لیے سیاسی سرگرمیاں عروج پر پہنچ گئی ہیں۔ انتخابی مہم کو تیز کرتے ہوئے پاکستان مسلم لیگ (ن) کے قائد و سابق وزیراعظم میاں نواز شریف 24 جولائی کو قائدِ اعظم سٹیڈیم میرپور میں ایک عظیم الشان جلسے سے خطاب کریں گے۔

جلسے میں وزیراعلیٰ پنجاب مریم نواز شریف سمیت مسلم لیگ (ن) کے مرکزی اور آزاد کشمیر کے تمام سینئر رہنما شرکت کریں گے۔ قائدِ اعظم سٹیڈیم میں جلسے کی تیاریاں تیز کر دی گئی ہیں، جہاں سٹیج کی تیاری اور دیگر انتظامات کے لیے کنٹینرز اور سکیورٹی آلات پہنچا دیے گئے ہیں۔ لیگ کے مقامی رہنماؤں کے مطابق یہ جلسہ میرپور میں مسلم لیگ (ن) کی انتخابی مہم کے لیے اہم موڑ ثابت ہوگا۔