ازخود دوائیں مہنگی کرنے والی فارما کمپنیوں کے گرد گھیرا تنگ

ملک میں ڈی ریگولیٹڈ ادویات کی قیمتوں میں شدید اضافے کے معاملے پر حکومت نے سخت نوٹس لیتے ہوئے فارما کمپنیوں سے جواب طلب کر لیا ہے۔ ذرائع کے مطابق ادویات کی قیمتوں میں کم از کم 76.8 فیصد اور زیادہ سے زیادہ 1621 فیصد تک کا ہوشربا اضافہ ریکارڈ کیا گیا ہے، جس پر ڈرگ ریگولیٹری اتھارٹی (ڈریپ) نے 50 فیصد سے زائد اضافہ کرنے والی 37 نیشنل اور ملٹی نیشنل فارما کمپنیوں کو شوکاز نوٹسز جاری کر دیے ہیں۔ وفاقی وزیر صحت مصطفیٰ کمال کے مطابق یہ نوٹسز ان کی ہدایت پر جاری کیے گئے ہیں تاکہ کمپنیوں سے اس بے تحاشا اضافے کی وجوہات معلوم کی جا سکیں۔ ذرائع کا کہنا ہے کہ کل 92 دواؤں کی قیمتیں بڑھانے پر یہ اقدامات کیے گئے ہیں، جن میں سے 12 کمپنیوں نے 35 ادویات کے حوالے سے اپنے جوابات جمع کرا دیے ہیں، 2 نے مہلت مانگی ہے جبکہ جواب نہ دینے والی 23 کمپنیوں کو ریمائنڈر جاری کر دیے گئے ہیں۔ تمام کمپنیوں کے جوابات موصول ہونے کے بعد حکومت آئندہ کا حتمی لائحہ عمل طے کرے گی۔