سعودی بندرگاہوں کی ناکہ بندی کی تو بندوبست کرنا جانتے ہیں؛ ٹرمپ کی حوثیوں کو دھمکی

امریکی صدر ڈونلڈ ٹرمپ نے ایران کے حمایت یافتہ یمنی حوثی گروپ کو شدید تنبیہ کرتے ہوئے کہا ہے کہ اگر حوثیوں نے سعودی عرب کی بندرگاہوں یا بحیرہ احمر میں تجارتی جہاز رانی کی ناکہ بندی کی کوشش کی تو امریکا فوری اور فیصلہ کن کارروائی کرے گا۔ وائٹ ہاؤس میں لبنانی صدر جوزف عون کے ساتھ پریس بریفنگ کے دوران صدر ٹرمپ نے واضح کیا کہ امریکا حوثیوں کے کسی بھی مس ایڈونچر کا مؤثر جواب دینے کی پوری صلاحیت رکھتا ہے۔ انہوں نے 2025 میں حوثیوں کے خلاف دو ماہ تک جاری رہنے والی امریکی فضائی کارروائیوں کا حوالہ دیتے ہوئے کہا کہ اس کے بعد سے حوثیوں نے کوئی بڑا مسئلہ کھڑا نہیں کیا۔ حوثی گروپ کی جانب سے سعودی بندرگاہوں کے بائیکاٹ اور آئل ٹینکرز کو نشانہ بنانے کی دھمکی کے بعد عالمی توانائی کی سپلائی اور بین الاقوامی تجارت کے حوالے سے شدید تشویش پائی جا رہی ہے۔