نورین نیازی کا بیان افسوسناک، فوری معافی مانگیں: عون چودھری

وزیرِ مملکت برائے اوورسیز پاکستانیز عون چودھری نے بانی پی ٹی آئی کی بہن نورین نیازی کی جانب سے ‘معرکۂ حق’ سے متعلق دیے گئے بیان پر شدید ردعمل کا اظہار کرتے ہوئے اسے انتہائی افسوسناک، غیر ذمہ دارانہ اور قومی مفادات کے سراسر منافی قرار دیا ہے۔ اپنے ایک خصوصی بیان میں عون چودھری نے کہا کہ نورین نیازی کے اس بیان سے پوری قوم کے جذبات کو شدید ٹھیس پہنچی ہے، اس لیے انہیں اپنے الفاظ پر فوراً قوم سے معافی مانگنی چاہیے۔ انہوں نے پی ٹی آئی قیادت کو نشانہ بناتے ہوئے کہا کہ تحریک انصاف کے اندر موجود بعض عناصر اس وقت ملک کے لیے سب سے بڑا خطرہ بن چکے ہیں جن کی سیاست کا واحد مقصد ملک میں انتشار اور بدامنی پھیلانا ہے۔ وزیرِ مملکت کا مزید کہنا تھا کہ معرکۂ حق ہماری قومی فخر کی علامت ہے جس کی شاندار کامیابی پر پوری قوم کو اپنی سیکیورٹی فورسز پر ناز ہے، کیونکہ پاکستان کی سلامتی اور شناخت ہر چیز سے مقدم ہے۔ انہوں نے افواجِ پاکستان کی قربانیوں کو خراجِ تحسین پیش کرتے ہوئے یاد دلایا کہ ہماری فورسز نے ہمیشہ دشمن کو دھول چٹائی ہے اور ملک کا سر فخر سے بلند کیا ہے۔