مِس ورلڈ مقابلے میں پہلی بار پاکستان کی شرکت؛ نمائندگی انیقہ معراج کریں گی

لاہور کے فلیٹیز ہوٹل میں منعقدہ ایک پروقار تقریب میں 24 سالہ انیقہ معراج کو ‘مس ورلڈ پاکستان 2026’ کا تاج پہنا دیا گیا ہے، جس کے بعد وہ تاریخ میں پہلی بار مس ورلڈ کے عالمی مقابلے میں پاکستان کی نمائندگی کرنے کا اعزاز حاصل کریں گی۔ تقریب کے دوران 2022 کی مس پاکستان یونیورسل ڈاکٹر شفق اختر اور مسٹر پاکستان ورلڈ عطا اللہ گجر نے انہیں یہ تاج پہنایا۔ انیقہ معراج 9 اگست سے 5 ستمبر تک ویتنام میں ہونے والے مس ورلڈ کے 75ویں سالانہ ایڈیشن میں شرکت کریں گی۔ بزنس اور اکنامکس میں گریجویٹ اور آڈٹنگ کی طالبہ انیقہ معراج نے اپنے عزم کا اظہار کرتے ہوئے کہا کہ وہ مستقبل میں پبلک اکاؤنٹنٹ بننے کے ساتھ ساتھ بچوں کے حقوق اور لڑکیوں کی تعلیم کے لیے آواز اٹھانا چاہتی ہیں۔ واضح رہے کہ انیقہ اس سے قبل بھی مس ارتھ اور مس گلوبل سمیت کئی بین الاقوامی مقابلوں میں پاکستان کا نام روشن کر چکی ہیں۔