چین کے فارماسیوٹیکل تعاون سے سستی ادویات، سرمایہ کاری اور برآمدات میں اضافہ ہوگا، وزیراعظم

وزیراعظم شہباز شریف نے اسلام آباد میں منعقدہ پاکستان چین فارماسیوٹیکل اینڈ ہیلتھ کیئر بی ٹو بی انوسٹمنٹ کانفرنس سے خطاب کرتے ہوئے کہا ہے کہ چین کے ساتھ دواسازی کے شعبے میں تعاون سے ملک میں سستی و معیاری ادویات کی دستیابی، نئی سرمایہ کاری اور برآمدات میں نمایاں اضافہ ہوگا۔ انہوں نے چین کو پاکستان کا مخلص اور آزمودہ دوست قرار دیتے ہوئے کہا کہ سی پیک دونوں ممالک کے درمیان اقتصادی تعاون کا مضبوط پل ہے اور اب وقت آ گیا ہے کہ بزنس ٹو بزنس (B2B) شراکت داری کے ذریعے مقامی دواسازی کی صنعت کو جدید چینی ٹیکنالوجی اور مہارت سے لیس کیا جائے۔ اپنے خطاب میں وزیراعظم نے علاقائی امن کے لیے پاکستان کے سفارتی کردار کا بھی تذکرہ کیا اور بتایا کہ پاکستان کی مخلصانہ کوششوں کے باعث ہی ایران اور امریکہ کے درمیان اسلام آباد میں مفاحناتی یادداشت پر دستخط ممکن ہو سکے۔ انہوں نے عزم ظاہر کیا کہ یہ فارماسیوٹیکل شراکت داری مستقبل میں ملکی معیشت اور برآمدات کے لیے ایک اہم سنگِ میل ثابت ہوگی۔