معروف کرکٹر کی جانب سے مسلسل ہراساں کیا جارہا ہے، ماڈل ہما سلیم کا الزام

پاکستانی اداکارہ اور ماڈل ہما سلیم نے ایک نامعلوم پاکستانی کرکٹر پر ہراسانی، ذہنی تشدد، بلیک میلنگ اور کردار کشی کے سنگین الزامات عائد کرتے ہوئے باقاعدہ قانونی کارروائی کا اعلان کیا ہے۔ سوشل میڈیا پر جاری اپنے ایک بیان میں ہما سلیم نے دعویٰ کیا کہ تعلق ختم ہونے کے باوجود مذکورہ کرکٹر نے انہیں ذہنی طور پر ہراساں کرنا جاری رکھا اور جب بھی انہوں نے اپنی زندگی اور شوبز کیرئیر میں آگے بڑھنے کی کوشش کی، انہیں پریشان کیا گیا۔ ماڈل کا الزام ہے کہ کرکٹر اور ان کے خاندان نے مل کر ان کی کردار کشی کی منظم مہم چلائی اور ان کے پیشہ ورانہ حلقے، دوستوں اور خاندان کے لوگوں کو منفی پیغامات بھیج کر ان کی ساکھ کو نقصان پہنچانے کی کوشش کی۔

ہما سلیم نے کرکٹر کا نام ظاہر کیے بغیر انہیں “دھوکے باز، فراڈی اور خواتین کا استحصال کرنے والا” قرار دیتے ہوئے کہا کہ کوئی بھی خاتون خود کو اس وقت تک عوامی تنقید کے لیے پیش نہیں کرتی جب تک اس کے پاس تمام راستے بند نہ ہو جائیں۔ انہوں نے ایک اور سنگین دعویٰ کرتے ہوئے کہا کہ ان کے پاس مذکورہ کرکٹر کی جانب سے پاکستان کرکٹ بورڈ (پی سی بی) کے فنڈز ہوٹلوں میں مبینہ طور پر ذاتی مقاصد کے لیے استعمال کرنے کے ثبوت بھی موجود ہیں۔ اداکارہ کے مطابق ان کی قانونی ٹیم دستاویزی شواہد مرتب کر رہی ہے جو آئندہ چند روز میں قانونی کارروائی کے آغاز کے ساتھ ہی پبلک کر دیے جائیں گے۔ تاحال کسی کرکٹر یا پی سی بی کی جانب سے ان الزامات پر کوئی ردعمل سامنے نہیں آیا ہے۔