مراعات میں اضافہ، بلیو پاسپورٹ بل کی منظوری شرمناک ہے: احسن اقبال

وفاقی وزیر برائے منصوبہ بندی و ترقی احسن اقبال نے اراکینِ پارلیمنٹ کی مراعات میں اضافے اور ان کے اہلِ خانہ کو بلیو پاسپورٹ جاری کرنے سے متعلق ترمیمی بل پر سخت ترین ردعمل دیتے ہوئے اسے “شرمناک” قرار دے دیا ہے۔ احسن اقبال نے سینیٹ کی قائمہ کمیٹی کی جانب سے اراکینِ پارلیمنٹ کی اہلیہ اور 28 سال تک کی عمر کے بچوں کو بلیو پاسپورٹ کی فراہمی کی منظوری کو شدید تنقید کا نشانہ بناتے ہوئے اسے انتہائی افسوسناک فیصلہ قرار دیا۔

وفاقی وزیر کا کہنا تھا کہ گرین پاسپورٹ پاکستان کی اصل پہچان، وقار اور قومی شان کی علامت ہے اور ایسے خود غرضانہ قوانین ملک کے مجموعی تشخص اور قومی وقار کو بری طرح مجروح کرتے ہیں، جس کی وہ بھرپور مذمت کرتے ہیں۔ انہوں نے واضح الفاظ میں کہا کہ ملک کے موجودہ حالات میں قومی مفاد کے منافی اشرافیہ کو نوازنے اور مراعات دینے کے بجائے عوامی فلاح و بہبود اور معاشی بحالی کو ترجیح دی جانی چاہیے۔