کاہنہ: گھریلو ناچاقی پر شوہر کے تشدد سے بیوی جاں بحق، 2 ملزم گرفتار

کاہنہ کے علاقے میں گھریلو ناچاقی پر شوہر نے مبینہ طور پر بہیمانہ تشدد کر کے اپنی 35 سالہ بیوی کو قتل کر دیا، جس کے بعد پولیس نے کارروائی کرتے ہوئے دو ملزمان کو گرفتار کر لیا ہے۔ پولیس حکام کے مطابق چوکی ہلوکی پولیس نے فوری ایکشن لیتے ہوئے مقتولہ کے شوہر سلمان اور اس کے بھائی عثمان کو حراست میں لے لیا ہے۔ ایس پی ماڈل ٹاؤن نے واقعے کی تفصیلات بتاتے ہوئے کہا کہ ملزمان نے معمولی گھریلو ناچاقی پر 35 سالہ جانپری کو شدید تشدد کا نشانہ بنایا، جس سے وہ بری طرح زخمی ہو گئی۔ زخمی خاتون کو طبی امداد کے لیے اسپتال منتقل کیا جا رہا تھا لیکن وہ زخموں کی تاب نہ لاتے ہوئے راستے میں ہی دم توڑ گئی۔ پولیس کا کہنا ہے کہ مقتولہ کے بھائی جاوید کی مدعیت میں واقعے کا مقدمہ درج کر کے مزید تفتیش شروع کر دی گئی ہے۔ پولیس حکام نے واضح کیا ہے کہ خواتین کا استحصال کرنے والے قانون کی گرفت سے بچ نہیں سکتے اور ملوث ملزمان کو عدالت سے قرار واقعی سزا دلوائی جائے گی۔